Referencias en la Prensa a la Investigación en la USC

FlowReserve Labs, unha spin-off da USC e a Fundación Instituto de Investigación Sanitaria de Santiago (FIDIS), será o único proxecto español na fase final da Competición Internacional de Innovación e Emprendemento de China Taihu (CTIIEC). Logo dun proceso de selección entre máis de mil proxectos en todo o mundo, a empresa competirá por lograr un dos premios desta edición, que premia os mellores proxectos internacionais de innovación en medicina, Internet das cousas (IoT), tecnoloxías de información, bioloxía, fabricación de novos materiais e enerxías renovables.

Máis información

Investigadores do Instituto de Acuicultura da USC, da Facultade de Ciencias da Coruña e do Centro de Investigacións Científicas Avanzadas acaban de ser recoñecidos nos Premios á Transferencia de Tecnoloxía en Galicia, concretamente co premio "Francisco Guitián Ojea", dirixido a aqueles traballos de investigación aplicada co obxecto de recoñecer a creación dunha tecnoloxía aínda non transferida e da que se deriven claras aplicacións para o desenvolvemento socioeconómico de Galicia. O proxecto no que participa o equipo da USC leva por título "Utilización de proteínas de parece celular bacteriana como base para a formulación de vacinas de subunidades con aplicación en acuicultura".

Máis información

O U-Ránking elaborado pola Fundación BBVA e o Instituto Valenciano de Investigaciones Económicas volve situar a USC, na súa edición correspondente a 2021, no quinto chanzo dunha clasificación composta por doce niveis. Esta edición analiza un total de 72 universidades —48 públicas e 24 privadas—cubrindo o 98% do Sistema Universitario Español, en termos de número de estudantes de grao, e examina máis de 3.400 graos e dobres graos. A USC comparte esta quinta posición con outras dezaseis universidades. Esta listaxe ordena as universidades españolas en función do seu rendemento docente, así como no relativo á investigación e á innovación, corrixindo os efectos do distinto tamaño das institucións para facelas comparables entre si.

Na clasificación que atinxe de modo específico aos resultados do eido docente, a USC mantense na cuarta posición dun total de sete postos. Nese cuarto posto, sitúanse 23 institucións. Asemade, no relativo á clasificación que recolle os resultados da avaliación da actividade investigadora e innovadora, a USC ascende un chanzo ao situarse sexta xunto con outras tres universidades nunha listaxe integrada por 18 niveis.

Máis información

Un equipo do Instituto Galego de Física de Altas Enerxías (IGFAE) traballa no desenvolvemento dunha nova técnica de detección para o experimento DUNE, o máis sofisticado do mundo no estudo dos neutrinos, situado entre o acelerador de partículas PIP-II, en Fermilab, e o laboratorio subterráneo de Sanford (EE. UU.). Entre os obxectivos científicos de DUNE atópase a observación, cunha precisión sen precedentes, de como os neutrinos cambian de identidade ou "sabor" mentres se desprazan, o que podería axudar a explicar a asimetría observada entre a materia e antimateria no noso universo.

Máis información