Programa ARGOSNo contexto de crise que estamos vivindo, hoxe máis que nunca faise necesario impulsar e apoiar aos emprendedores, que son a base do tecido produtivo da sociedade. Todos os organismos con competencia na materia, desde os europeos ata os autonómicos, están adoptando medidas e actuacións encamiñadas ao fomento do emprendemento. Neste senso, a Área de Valorización, Transferencia e Emprendemento da USC (AVTE), Uninova e as Facultades de Ciencias Económicas e Empresariais de Santiago e Administración e Dirección de Empresas de Lugo queren facer un especial esforzo para dinamizar á comunidade universitaria en todo o referente á creación de empresas.
Con este Programa preténdese identificar a potenciais emprendedores e axudalos a crear empresas en colaboración cun equipo multidisciplinar. Dotalos dos coñecementos dun modelo empresarial contrastado así como das ferramentas adecuadas para a súa formación empresarial e para desenvolver o seu proxecto.
Queremos contribuír a que novas iniciativas dispoñan dunha base sólida na que apoiarse para minimizar o risco asumido á hora de crear empresas e onde las decisións respondan a modelos empresariais sólidos, evitando que se cometan os erros máis frecuentes dos equipos de emprendedores, como que todos os socios fundadores teñan un perfil moi similar, a ausencia dun líder claramente definido, o excesivo individualismo na toma de decisións, unha desigual dedicación por parte dos distintos compoñentes do equipo ou o feito de non recoñecer que é necesaria formación complementaria da estritamente académica.
OBXECTIVOS
- Conxugar competencias de xestión empresarial con competencias científicas ou técnicas para o desenvolvemento de novas oportunidades de negocio.
- Impulsar o traballo en equipo.
- Fomentar a interacción entre persoas con diferentes perfís persoais dentro dun mesmo equipo de traballo.
- Dinamizar a transferencia do coñecemento xerado na USC.
|
