Ana Otero doutorouse na Universidade de Santiago de Compostela no ano 1995 cunha tese sobre os cultivos continuos de microalgas mariñas para distintas aplicacións biotecnolóxicas. Fixo dúas estadías post-doutorais como bolseira da Unión Europea, unha en Xapón (National Institute for Basic Biology) sobre bioloxía molecular da síntese de lípidos nas microalgas mariñas, e en Italia (Universitá degli Studi di Firenze) sobre a fisioloxía da síntese de polisacáridos en cianobacterias. Na actualidade é Profesora titular de Microbioloxía da USC. Ademais de continuar coa liña tradicional de investigación sobre aplicacións biotecnolóxicas de microorganismos fotosintéticos, o seu grupo de investigación iniciou en 2006 unha nova liña de investigación para a busca de alternativas ó uso de antibióticos mediante a interceptación dos sistemas de comunicación bacteriana (quorum quenching). Neste campo ten patentadas dúas cepas bacterianas mariñas con unha elevada capacidade de quorum quenching de sinais bacterianas tipo acil-homoserín-lactona. A. Otero é autora de mais de 60 artigos en revistas científicas internacionais, dirixiu 10 teses doutorais e ten participado en máis de 15 proxectos de investigación, tanto nacionais como internacionais.