Os receptores acoplados a proteínas G (GPCRs) constitúen as dianas de máis do 40% dos fármacos empregados na terapéutica, aínda que só o 10% dos GPCRs non olfativos do xenoma humano son atinxidos por estes fármacos e aínda descoñecemos os ligandos endóxenos ou o papel fisio-patolóxico dun certo número de GPCRs. Estudos recentes revelan algúns aspectos moleculares da farmacoloxía dos GPCRs tales como sinalización dirixida por agonista, oligomerización e alosterismo ou tempo de residencia do ligando no sitio de unión do receptor, que parecen determinantes para a diversidade, a especificidade e o curso espazo-temporal da sinalización celular destes receptores. No noso grupo, estamos interesados nestes aspectos críticos da sinalización de determinados GPCRs relevantes en patoloxías psiquiátricas complexas como a depresión ou a esquizofrenia, así como no impacto de polimorfismos de nucleótido único (SNPs) non sinónimos ou outras variantes xenéticas na funcionalidade destes receptores. O noso obxectivo é coñecer mellor o potencial destes receptores de membrana como dianas terapéuticas ou como biomarcadores de función alterada na enfermidade ou de resposta ao tratamento. A nosa investigación desenvólvese en estreita colaboración con outros grupos de investigación nacionais e internacionais fundamentalmente nas áreas da xenética de enfermidades psiquiátricas, a química medicinal e a bioinformática. O noso grupo tamén vén participando en distinto grao en proxectos colaborativos con outros grupos de investigación e empresas farmacéuticas no ámbito de fases temperás do I + D de fármacos.