Eventos relacionados coa Investigación

Nesta sección recollemos algún dos eventos de interese para os investigadores.

A Axencia Galega de Innovación (GAIN) da Xunta de Galicia, en colaboración coa Fundación Barrié, organiza o curso online "Transferencia de coñecemento e interacción co Sistema de I+D+i". Esta actividade enmárcase no Programa Ignicia Transferencia de Coñecemento, nas actuacións orientadas a impulsar o desenvolvemento profesional dos investigadores e investigadoras dos centros de coñecemento do Sistema Galego de i+D+i en aspectos relacionados coa comercialización de resultados da i+D.

Este curso, de carácter gratuíto, está dirixido a persoal investigador posdoutoral, a investigadores/as contratados/as con cargo a proxectos de Universidades e Organismos Públicos de Investigación, así como a investigadores/as e tecnólogos/as dos Centros Tecnolóxicos. O seu obxectivo é introducir ao persoal investigador nas bases da transferencia de coñecemento e a comercialización de resultados da I+D, ademais de contribuír ao desenvolvemento das seguintes capacidades: comprensión do valor da innovación e da investigación traslacional académica, as habilidades para presentar a investigación e conectar coa industria, e as estratexias para mellorar a produtividade da innovación nun entorno académico.

Cunha duración total de 40 horas, distribuídas en 10 sesións semanais de 4 horas cada unha, o curso desenvolverase entre o 5 de marzo e o 14 de maio de 2021 en horario de 10:00 h a 14:00 h. O programa de contidos estrutúrase en 3 módulos que serán impartidos integramente en inglés: "Fundamentos sobre transferencia de coñecemento" (16 horas), "Comunicación e presentación da investigación" (8 horas) e "Ecosistema de innovación, impacto e colaboración" (16 horas). Pode consultar toda a información do programa premendo aquí. Para inscribirse, cubra o formulario na seguinte ligazón. O prazo de inscrición remata o día 26 de febreiro ás 20:00 h.

Para calquera dúbida ou aclaración pode poñerse en contacto a través do correo electrónico programacion.centros.gain@xunta.gal ou no teléfono 981 957 012.

High Tech Auto é unha incubadora do sector de automoción de Galicia cuxo obxectivo é a transferencia de tecnoloxía a dito sector e ofrece apoios e oportunidades gratuítas, para poñer en marcha proxectos de emprendemento relacionados coa automoción e industria auxiliar; entre os apoios atópanse o networking tecnolóxico e empresarial, obradoiros de negocio, innovación, financiamento e internacionalización, un laboratorio de fabricación e servizos dixitais e tecnolóxicos de automoción, así como espazos de incubación para os proxectos. Trátase da 2ª Edición da incubadora e buscase seleccionar 10 proxectos para participar nos programas. A convocatoria para inscribirse remata o 21 de maio de 2021.

INCUBADORA HIGH TECH AUTO

Ligazón ao evento: https://zoom.us/webinar/register/3016183068731/WN_HIId9AmZSba1DchMwr1u4A

PROGRAMA:

12:00 – 12:05 Benvida Vicente Pérez, Vicerreitor de Investigación e Innovación, Universidade de Santiago de Compostela

12:05 – 12:30 Características 2ª Edición HTA, Heiko Unzalu, Coordinador HTA

12:30 – 12:35 Fany Suarez, subdirectora de Oficina Galicia Emprende, Igape

12:35 – 12:45 Preguntas audiencia

12:45 – 12:50 Despedida Vicente Pérez, Vicerreitor de Investigación e Innovación, Universidade de Santiago de Compostela

O CEIDA acaba de abrir a inscrición da 3ª edición do Curso Online "Infraestrutura Verde Urbana: Claves para a Planificación, Xestión e Avaliación", no que se abordarán cuestións clave vinculadas ao deseño, implementación e mantemento da infraestrutura verde nas contornas urbanas, o papel que xogan na planificación ante os novos retos das cidades, a relevancia da educación ambiental e a participación cidadá nestes procesos, así como os instrumentos necesarios para a súa correcta avaliación e seguimento.

O programa formativo, desenvolvido a través da Aula Virtual do CEIDA, consta de 4 módulos teóricos e diferentes exercicios prácticos para realizar ao longo de 7 semanas (40 horas), con debates e foros virtuais, co fin de crear un coñecemento colectivo a partir das experiencias e vivencias das persoas participantes. O idioma de todos os materiais e recursos didácticos estarán dispoñibles en español.

A USC será a anfitrioa da VII Xornada Universitaria Galega en Xénero, organizada polas oficinas de igualdade de xénero das tres universidades galegas, que terá lugar os vindeiros 10 e 11 de xuño (encontro virtual).

A presentación de propostas será a través do envío da comunicación completa aos seguintes enderezos electrónicos, segundo as áreas temáticas:

- Violencias contra as mulleres (oficina.igualdade@udc.gal)

- Mulleres, investigación e COVID (igualdade@uvigo.es)

- Perspectiva de xénero na docencia universitaria (oix@usc.gal)

Prazo de presentación: 30 de abril

Publicación: Realizarase unha publicación dos traballos presentados e defendidos (de forma oral ou na sesión póster) que disporá de ISBN.

Os ESGI constitúen un foro para traballar de maneira conxunta científicos industriais e investigadores matemáticos sobre problemas de interese para a industria. O 163 ESGI, que reunirá a especialistas das ramas de Matemática Aplicada e Estatística e Investigación Operativa, ten como obxectivo o fomento da transferencia Matemática cara á Industria buscando activamente proxectos de investigación e desenvolvemento onde a Matemática teña unha especial relevancia.

Debido á pandemia de coronavirus (COVID - 19), o evento será completamente on-line.

Toda a información relativa ao evento actualizarase continuamente na páxina web do mesmo: http://www.math-in.net/163esgi/

A asistencia é gratuita na Modalidade Básica, pero é necesario rexistrarse previamente. A data límite de inscrición será o 31 de maio de 2021. http://www.math-in.net/163esgi/inscripcion-particulares

O Foro pretende cubrir unha oferta de formación especializada segundo os seguintes obxectivos:

• Coñecer a nova organización dos ensinos universitarios.
• Analizar e debater sobre a selección do profesorado contratado e funcionario.
• Coñecer e debater sobre a situación do doutoramento en España e a Unión Europea.
• Posta ao día da situación actual do proceso de Converxencia Europea en España e a Unión Europea.
• Coñecer os distintos plans que teñen as universidades españolas para potenciar a investigación, a calidade e a Converxencia Europea.
• Coñecer as distintas ferramentas para avaliar a calidade da investigación científica.

Envío de propostas a: secretariafecies@gmail.com (prazo ata o 27 de abril).